គោព្រៃកម្ពុជា ត្រៀមទទួលយកបទពិសោធថ្មីចុងឆ្នាំនេះ ក្នុងពានរង្វាន់តំបន់អាស៊ាន

 លទ្ធផលការចាប់ឆ្នោតនៃការប្រកួតពានរង្វាន់តំបន់អាស៊ាន «ASEAN Mitsubishi Electric Cup» ២០២៤ បានចេញជាផ្លូវការហើយ ដោយកម្ពុជាត្រូវប្រមូលយកបទពិសោធពីមិត្តៗអាស៊ានចំនួន៤ប្រទេសក្នុងពូល A ដែលក្នុងនោះក៏មានអ្នកជិតខាតផ្ទះលេខ២ផងដែរ…។

ការចាប់ឆ្នោតនៅរសៀលថ្ងៃទី២១ ខែឧសភានេះ ​បង្ហាញថា ក្រុមគោព្រៃកម្ពុជាស្ថិតក្នុងពូល A ជាមួយមិត្តអាស៊ានចំនួន៤ទៀតរួមមាន៖ ប្រទេសថៃ ម៉ាឡេស៊ី សិង្ហបុរី និងមួយក្រុមទៀតរង់ចាំការប្រកួតជម្រុះរវាងទីម័រខាងកើត និងប្រុយណេ ដើម្បីបំពេញកូតាពូល A ដែលមាន៥ក្រុម។

ការប្រកួតនឹងធ្វើឡើងចាប់ពីថ្ងៃទី២៣ ខែវិច្ឆិកា ដល់ថ្ងៃទី២១ខែធ្នូ ឆ្នាំ២០២៤។ នៅចំពោះមុខគូប្រកួតដែលភាគច្រើនជាក្រុមខ្លាំង និងមានកម្រិតលើខ្លួន កម្ពុជាច្បាស់ជាត្រូវធ្វើការធ្ងន់ថែមទៀត ខណៈអ្នកគាំទ្របង្ហាញការយល់ឃើញស្រដៀងៗគ្នា កម្ពុជាច្បាស់ជាប្រមូលបានបទពិសោធច្រើនទៀតហើយពីការប្រកួតដែលគ្រោងចំណាយពេលជិតពេញមួយខែនេះ។

ក្នុងប្រវត្តិសាស្ត្របាល់ទាត់សម័យទំនើប កម្ពុជាមិនដែលបានឆ្លងផុតវគ្គក្នុងពូលទៅវគ្គ៤ក្រុមចុងក្រោយឡើយ។ ការដែលត្រូវប្រកួតជាមួយអ្នកជិតខាងថែមទៀតធ្វើឱ្យអ្នកគាំទ្រស្ទើរតែទាំងអស់លែងដាក់ការទុកចិត្តលើគោព្រៃកម្ពុជា។

លែងទុកចិត្តគឺចាប់តាំងពីពេលដែលកម្ពុជាចាញ់ប៉ាគីស្ថានក្នុងវគ្គជម្រុះ World Cup ហើយគុណភាពលេងរបស់ក្រុម U២២ កាលស៊ីហ្គេមនៅកម្ពុជាទៀតសោត ធ្វើឱ្យអ្នកគាំទ្រជាច្រើនអស់ទឹកចិត្តនឹងគាំទ្រ។ គួររំឭកថា កាលពីស៊ីហ្គេមឆ្នាំ២០២៣ កម្ពុជាក៏មិនបានឆ្លងចេះពីវគ្គក្នុងពូលដែរ បើទោះបីជាបានត្រៀមខ្លួនអស់ពេលជាច្រើនសម្រាប់ព្រឹត្តិការណ៍មួយនេះក៏ដោយ។

សូមជម្រាបថា កម្ពុជានឹងប្រកួតមិត្តភាពអន្តរជាតិ ជាមួយប្រទេសម៉ុងហ្គោលីនៅថ្ងៃទី៧មិថុនា ខែក្រោយនេះ ដែលជាប្រកួតក្នុងដីដំបូងគេបង្អស់ក្នុងឆ្នាំ២០២៤សម្រាប់ក្រុមជម្រើសជាតិ។ សំបុត្របាននិងកំពុងដាក់លក់ហើយ ដែលមានតម្លៃ៣ម៉ឺនរៀលសម្រាប់កៅអី VIP និង១ម៉ឺនរៀលសម្រាប់ធម្មតា។ ហេតុនេះរង់ចាំមើលថា តើសន្ទុះនៃការគាំទ្រមានកម្រិតណា ឬមួយអ្នកគាំទ្រអស់ទឹកចិត្តជាមួយនឹងគោព្រៃទៅហើយ?អានពត៌មានប្រចាំថ្ងៃ