អ្នកគាំទ្របារម្ភកម្ពុជាចាញ់ស្រីលង្កានៅប្រកួតជម្រុះ AFC Asian Cup 2027 ដូចធ្លាប់ខកចិត្តពេលចាញ់ប៉ាគីស្ថានពេលជម្រុះ World Cup

 បាល់ទាត់៖ ក្រុមបាល់ទាត់ជម្រើសជាតិកម្ពុជា នឹងប្រកួតជាមួយក្រុមជម្រើសជាតិ ស្រីលង្កា សម្រាប់ការប្រកួតជម្រុះ AFC Asian Cup Saudi Arabia 2027 បន្ទាប់ពីចាប់ឆ្នោតរួចរាល់នៅរសៀលថ្ងៃទី៩ ខែឧសភា ឆ្នាំ២០២៤ នៅប្រទេសម៉ាឡេស៊ី។

នៅចំពោះមុខ ជំនួបជាមួយក្រុមដែលធ្លាប់តែមានកម្រិតទាបជាងកម្ពុជា អ្នកគាំទ្រជាច្រើនបានសម្តែងក្តីបារម្ភ ខ្លាចគោព្រៃចាញ់ក្រុមស្រីលង្កា ធ្លាក់ចេញពីវគ្គជម្រុះនេះទៀត។

អ្នកគាំទ្របារម្ភក៏ដោយសារតែ គោព្រៃកម្ពុជា មិនបានបង្ហាញទម្រង់លេងល្អប៉ុន្មានទេនៅប៉ុន្មានប្រកួតចុងក្រោយ ពិសេសបានធ្វើឱ្យអ្នកគាំទ្រខកចិត្តជាខ្លាំង ក្រោយចាញ់ក្រុមប៉ាគីស្ថាន ដែលជាក្រុមធ្លាប់តែមានកម្រិតក្រោមកម្ពុជា ធ្វើឱ្យធ្លាក់ចេញពីការប្រកួតជម្រុះ World Cup។

គួរជម្រាបថា ក្រៅពីការប្រកួតរបស់កម្ពុជានិងស្រីលង្កា ជម្រើសជាតិ ម៉ុងហ្គោលី នឹងត្រូវប៉ះ ទីម័រខាងកើត ខណៈម៉ាកាវ ប៉ះ ព្រុយណេ ក្នុងការប្រកួតពានរង្វាន់ដូចគ្នានេះ។

ការប្រកួតជម្រុះនឹងធ្វើនៅថ្ងៃទី៥ និងថ្ងៃទី១០ ខែកញ្ញា ឆ្នាំ២០២៤ ដែលមានការប្រកួតពីរជើង គឺក្នុងដី និង ក្រៅដី។

ក្រុម៣ ដែលទទួលបានជ័យជម្នះនឹងឡើងទៅជម្រុះជុំទី៣ (វគ្គជម្រុះក្នុងពូល) ដែលមាន១៩ប្រទេស​ ដើម្បីប្រកួតប្រជែងគ្នាយក៦ក្រុម ឡើងទៅជុំផ្តាច់ព្រ័ត្រ 2027 AFC Asian Cup នៅប្រទេសអារ៉ាប៊ីសាអ៊ូឌីត ជាម្ចាស់ផ្ទះ។

សូមបញ្ជាក់ថា នេះជាឱកាសចុងក្រោយក្នុងពានរង្វាន់ AFC Asian Cup 2027 សម្រាប់ក្រុមជម្រើសជាតិទាំង៦ បន្ទាប់ពីបានធ្លាក់ចេញពីជម្រុះជើងឯកពិភពលោក ឆ្នាំ២០២៦ (FIFA World Cup 2026) តាំងពីជុំទី១។

គួររំលឹកដែរថា ការប្រកួតចុងក្រោយរវាងកម្ពុជា-ស្រីលង្កា គឺកាលពីថ្ងៃទី០៩ តុលា ២០១៦ ក្នុងការប្រកួតមិត្តភាពអន្តរជាតិ ដោយកាលណោះកម្ពុជា យកឈ្នះស្រីលង្កា ក្នុងលទ្ធផល៤-0។ព័ត៌មានកីឡាថ្មីៗប្រចាំថ្ងៃ