ភ្នំពេញក្រោន​ និង ព្រះខ័នរាជស្វាយរៀង ក្លាយជាគូប្រជែងតែមួយក្នុងពានរង្វាន់ ២ ផ្សេងគ្នា

 ក្លឹបបាល់ទាត់ភ្នំពេញក្រោន និងព្រះខ័នរាជស្វាយរៀង បានក្លាយជាគូប្រជែងដណ្តើមជើងឯកក្នុងពានរង្វាន់២ផ្សេងគ្នា ពោលគឺប្រជែងដណ្តើមជើងឯកលីគកំពូល និងដណ្តើមពានរង្វាន់សម្តេច ហ៊ុនសែន ក្នុងឆ្នាំ២០២៤ នេះ។

ការណ៍នេះ គឺក្រោយពីក្លឹបបាល់ទាត់ភ្នំពេញក្រោនបានយកឈ្នះ និងឡើងទៅកាន់វគ្គផ្តាច់ព្រ័ត្រពានរង្វាន់សម្តេច ហ៊ុន សែន កាលពីយប់ថ្ងៃទី១០មេសា ឆ្នាំ២០២៤។ នៅទីបំផុតភ្នំពេញក្រោន បានដោះបណ្តាសារមិនដែលឡើងទៅលេងវគ្គផ្តាច់ព្រ័ត្រពានសម្តេចក្នុងពេល១៤ឆ្នាំចុងក្រោយបានសម្រេច ក្រោយពីយកឈ្នះក្រុមវិសាខា ។

ក្នុងលទ្ធផលដ៏មិនគួរឱ្យជឿ៤ទល់១ ដែលជាការវាយបកតាមពីក្រោយវិសាខាវិញដល់ទៅ ៤ គ្រាប់ ក្រោយក្លឹបអ្នកមានធូរធារមួយនេះ នាំមុខភ្នំពេញក្រោនតាំងពីតង់ទី១នៅនាទី២៩។ ភ្នំពេញក្រោន បានវាយបកតាមស្មើវិញ​នៅនាទី៩០បូក១៥នាទី ដោយកីឡាករ ស-ម-ជ (Soe Moe Kyaw) ដែលធ្វើឱ្យការប្រកួតត្រូវបន្ថែមម៉ោង១៥នាទី២ដងដើ​ម្បីកាត់សេចក្តី។

ដោយហេតុថា កីឡាករវិសាខាទទួលបានកាតក្រហមម្នាក់នៅតង់ទី២ផងនោះ ធ្វើឱ្យភ្នំពេញក្រោនឆក់ឱ្យកាស វាយបក សុតបន្ថែម៣គ្រាប់ទៀតនៅនាទីទី១០៥ ដោយកីឡាករ លឹម ពិសុទ្ធ ដោយ ប្រាក់ ធីវា នៅនាទី១១៣ និង​កីឡាករជប៉ុន Shintaro នៅនាទី១២០ បូក ២។

ចំណែកក្លឹបព្រះខ័នរាជស្វាយរៀងមិនទទួលបានជ័យជំះទេ ក្នុងការប្រកួតពានសម្តេចជើងទី ២ កាលពីម្សិលមិញ ដោយចាញ់ក្រោមថ្វីជើងក្រុមភ្ញៀវបឹងកេត ២ទល់១ ប៉ុន្តែបើសរុបទាំង២ជើងទៅ គឺព្រះខ័នរាជស្វាយរៀងយកឈ្នះបឹងកេត៤ទល់នឹង៣។

លទ្ធផលនេះ បាននាំឱ្យភ្នំពេញក្រោនដឹកដៃស្វាយរៀងឡើងទៅដណ្តើមពានសម្តេចហ៊ុនសែន ដែលនឹងធ្វើឡើងនៅថ្ងៃទី២៨ ខែមេសា ឆ្នាំ ២០២៤ ខាងមុខ។ សូមជម្រាបថា នៅក្នុងក្របខណ្ឌលីគកំពូល ក្រុមទាំងពីរក៏ជាក្រុមតែពីរគត់ដែលនៅសេសសល់ក្នុងចំណោមក្រុមទាំង១០ ដែលមានភាគរយច្រើនក្នុងការដណ្តើមពានលីគកំពូល CPL ដោយសារក្រុមផ្សេងទៀតដាច់ពិន្ទុឆ្ងាយ ខណៈភ្នំពេញក្រោន និងស្វាយរៀងប្រដំត្រសងគ្នា។

គួរកត់សម្គាល់ថា ក្រុមទាំងពីរនៅសល់ ៤ ប្រកួតរៀងខ្លួននៅក្នុងដៃសម្រាប់បញ្ចប់ជុំទី៣ និងទៅលេងជុំទី៤ ហេតុនេះសិង្ហក្រហម និងដាវខៀវខេត្តស្វាយរៀង ត្រូវប្រឈមមុខគ្នាជាទ្វេដងលើសមរភូមិវាលស្មៅ ដែលជឿជាក់ថាប្រាកដជាទាក់ទាញអ្នកគាំទ្របានច្រើន៕អានពត៌មានប្រចាំថ្ងៃ