គោព្រៃកម្ពុជាហោះទៅដល់អារ៉ាប៊ីសាអូឌីតដោយសុវត្តិភាព ត្រៀមប្រកួតមិត្តភាពអន្តរជាតិ FIFA Series
ក្រុមជម្រើសជាតិគោព្រៃកម្ពុជា បានហោះទៅដល់ទឹកដីប្រទេសអារ៉ាប៊ីសាអូឌីតហើយ កាលពីថ្ងៃទី១៩មីនា ឆ្នាំ២០២៤ ហើយបាននិងកំពុងបន្តហ្វឹកហាត់នៅក្នុងទីក្រុង Jeddah ដើម្បីត្រៀមប្រកួតជើងទី១ នៅថ្ងៃទី២២មីនាខាងមុខ។ នេះបើយោងតាមការឱ្យដឹងពីសហព័ន្ធបាល់ទាត់កម្ពុជា…។
ការប្រកួតមិត្តភាពអន្តរជាតិ FIFA Series ដែលក្នុងនោះមាន២០ប្រទេសជាសមាជិកចូលរួមប្រកួត ខណៈដែលការប្រកួតធ្វើឡើងនៅ៤ប្រទេសផ្សេងគ្នារួមមាន៖ អាល់ហ្សេរី, អាហ្ស៊ែបៃហ្សង់, ស្រីលង្កា, និងអារ៉ាប៊ីសាអូឌីត។
ដោយឡែក ការប្រកួតនៅលើវាលស្មៅអារ៉ាប៊ីសាអូឌីត ត្រូវបានចែកចេញជា២ពូលគឺពូលA មាន៖ ប្រទេសគុយវេដ, ប្រទេសហ្គីណេអេក្វាទ័រ, ហ្គីយ៉ាន, និងកម្ពុជាយើង។ ចំណែកឯពូលB មាន៖ ហ្គីណេ, វ៉ានូអាទូ, ប៊ឺមូដា, និងប្រ៊ុយណេ។
គួរជម្រាបថា ការប្រកួតមិត្តភាពអន្តរជាតិ FIFA Series ក្រុមជម្រើសជាតិកម្ពុជានឹងត្រូវប្រកួតនៅក្នុងទឹកដីនៃប្រទេស អារ៉ាប៊ីសាអូឌីត សម្រាប់ជើងទី១ ត្រូវជួបជាមួយក្រុមជម្រើសជាតិហ្គីណេអេក្វាទ័រ មកពីទ្វីបអាហ្វ្រិក នាថ្ងៃទី២២ ខែមីនា។
ដោយឡែក សម្រាប់ជើងទី២ កម្ពុជាត្រូវជួបជាមួយក្រុមជម្រើសជាតិហ្គីយ៉ាន ដែលមកពីទ្វីបអាម៉េរិកខាងត្បូង នៅ៤ថ្ងៃបន្ទាប់ ពោលគឺថ្ងៃទី២៦មីនា ឆ្នាំ២០២៤…។
សូមបញ្ជាក់ផងដែរថា ការប្រកួតមិត្តភាពអន្តរជាតិ FIFA Series នេះ ធ្វើឡើងក្នុងគោលបំណងសាកល្បងសមត្ថភាពក្រុមជម្រើសជាតិ ដែលជាធម្មតាមិនមានឱកាសប្រកួតជាមួយគ្នា និងជំរុញឱ្យមានការប្រកួតជាអន្តរជាតិបន្ថែមទៀត ដើម្បីអភិវឌ្ឍន៍បាល់ទាត់ពិភពលោក។
ថ្វីដ្បិតតែមិនមានពានរង្វាន់ ឬប្រាក់រង្វាន់ក៏ដោយ ប៉ុន្តែ FIFA Series នេះ ត្រូវបានរចនាឡើងដើម្បីផ្តល់អត្ថប្រយោជន៍ដល់ក្រុមជម្រើសជាតិ ដែលមិនមានឱកាសលេងជាមួយក្រុមមកពីសហព័ន្ធផ្សេងៗ ដោយ FIFA បានកំណត់សម្រាប់ការចំណាយលើការធ្វើដំណើរ៕អានពត៌មានប្រចាំថ្ងៃ
Comments
Post a Comment