គ្រូបង្វឹក២រូប កំពុងក្លាយជាបេក្ខភាពនាំមុខដឹកនាំក្រុមវិសាខា
(បាល់ទាត់)៖ លោក មាស ចាន់ណា និងលោកទុនជី អាយ៉ូយីនកា អាកេប Tunji Ayoyinka Akeeb កំពុងក្លាយជាបេក្ខភាពនាំមុខក្នុងការក្លាយជាគ្រូបង្វឹកពេញសិទ្ធិរបស់ក្លឹបបាល់ទាត់វិសាខា នាពេលដ៏ខ្លីខាងមុខនេះ បន្ទាប់ពីក្លឹបបានបញ្ចប់កុងត្រាជាមួយលោក ស៊ីម៉ុន ម័កមេនីមី កាលពីថ្ងៃទី០៥ធ្នូ ឆ្នាំ២០២៣ ម្សិលមិញ..។
ការបញ្ចប់កុងត្រារបស់លោក ស៊ីម៉ុន ម័កមេនីមី មុនពេលកំណត់ បន្ទាប់ពីលោកដឹកនាំក្រុមមិនទទួលលទ្ធផលល្អ។ ការសម្រេចចិត្តនេះ ការមានការឯកភាពគ្នារវាងក្លឹប និងបុគ្គលផ្ទាស់ខ្លួនផងដែរ។ ក្រោយពីការចាកចេញរបស់បុរសសញ្ជាតិស្កុតឡេនវ័យ៤៦ឆ្នាំរូបនេះ ត្រូវបានអ្នកគាំទ្ររបស់ក្លឹប ក៏ដូចជាអ្នកវិភាគបាល់ទាត់ក្នុងស្រុក រំពឹងថា លោក មាស ចាន់ណា ដែលកំពុងកាន់តួនាទីជានាយកបច្ចេកទេស និងលោក ទុនជី អាយ៉ូយីនកា អាកេប ជាគ្រូជំនួយ នឹងក្លាយជាបេក្ខភាពនាំមុខ ក្នុងការក្លាយខ្លួនជាគ្រូបង្វឹកពេញសិទ្ធិរបស់ក្លឹបបាល់ទាត់វិសាខា នាពេលដ៏ខ្លីខាងមុខនេះ។
លោក មាស ចាន់ណា និងលោក ទុនជី អាយ៉ូយីនកា អាកេប សុទ្ធសឹងតែយល់ច្បាស់ពីបរិបទបាល់ទាត់នៅកម្ពុជា។ ជាក់ស្តែង កាលពីឆ្នាំ២០២១ ក្នុងនាមជាគ្រូបង្វឹករបស់ក្រុមវិសាខា លោក មាស ចាន់ណា បានដឹកនាំក្រុមឈ្នះជើងឯកពានរង្វាន់ Hun Sen Cup ជាលើកដំបូងក្នុងប្រវត្តិសាស្ត្ររបស់ក្លឹប ក៏ដូចជាដឹកនាំក្រុមបានលេងពានរង្វាន់លំដាប់ទី២ របស់ទ្វីបអាស៊ី AFC Cup ឆ្នាំ២០២២ ក្នុងវគ្គជម្រុះផងដែរ ប៉ុន្តែពេលនោះធ្លាក់ត្រឹមវគ្គចែកពូលប៉ុណ្ណោះ។
ដូច្នេះ លោកទាំងពីរពិតជាសក្តិសមធ្វើជាគ្រូបង្វឹកបន្តរបស់ក្លឹបបាល់ទាត់វិសាខាណាស់ សម្រាប់ការប្រកួត ដែលនៅសេសសល់ ក្នុងរដូវកាលឆ្នាំ២០២៣-២៤ នេះ។ សូមជម្រាបថា បច្ចុប្បន្ន ក្រុមវិសាខា កំពុងឈរនៅលេខរៀងទី៣ក្នុងលីគជាបណ្តោះអាសន្នជាមួយពិន្ទុ២៣ និងត្រូវស្វាគមន៍ក្រុមនាគខៀវបឹងកេត មកកាន់ទឹកដីព្រីសន៍ នាចុងសប្តាហ៍នេះ សម្រាប់ការប្រកួតសប្តាហ៍ទី១៣ នៃក្របខណ្ឌលីគកំពូលកម្ពុជា Cambodia Premier League រដូវកាល២០២៣-២៤៕ព័ត៌មានកីឡាថ្មីៗប្រចាំថ្ងៃ
Comments
Post a Comment